“Sa kadamo sang problema sa Pilipinas, unahon gid sang mga congressman ang impeachment?”
Amo ini ang isa sa mga pamangkot nga ginsabat ni House Committee on Justice chairperson Rep. Gerville Luistro sa iya opening remarks sa hearing sang panel kaangot sa impeachment complaints batok kay Vice President Sara Duterte.
Husto man suno kay Luistro nga sampaw-sampaw ang gina-atubang nga problema sa Pilipinas lakip na ang krisis kag kurapsyon, apang ang iya pamangkot sa mga kritiko: “Does the existence of many problems mean we should ignore one specific problem?”
Pahayag sang kongresista, mahimo gid matungdan sang committee ang ila papel sa idalom sang Konstitusyon, samtang nagahulag naman ang gobyerno agud ma-address ang iban nga mga problema.
“Multitasking ang ating gobyerno,” pahayag pa sini.
Ginpalabtikan man sini ang pag-absent ni Duterte sa hearing sang Kamara.
Sa mas temprano nga bahin sang iya speech, ginsiling ni Luistro nga wala sila naga-conduct sang trial baliskad sa akusasyon sang mga supporters sang mga Duterte.
Gin-athag sini nga naga-initiate sila agud malantaw kun may probable cause ang impeachment complaints — kun wala, mahimo ibasura; apang kun may yara, ipasaka ini sa Senado nga amo ang may katungdanan para sa trial.#
