Ginkumpirma sang Department of Migrant Workers (DMW) nga madamo sang Overseas Filipino Workers (OFWs) ang nadulaan sang trabaho bangud sa gyera nga nagakatabo sa Middle East.
Suno kay DMW Undersecretary Jainal Rasul Jr. pila ka mga OFW ang permanente nga nadulaan sang trabaho samtang may iban naman nga temporary nga nag-untat anay sa pag-obra.
Naghatag naman ang ahensya sang bulig sa mga apektado nga mga overseas workers kag ginhimo nga simple ang proseso sang aplikasyon agud makauha sang bulig pinansyal nga nagalab-ot sang 200 dollars ukon P12, 100 nga halin sa pondo sang ahensya.
Samtang, gin-report naman ni DMW Secretary Hans Leo Cacdac nga naglab-ot sa kabilugan nga 6, 706 ang na-repatriate kun sa diin 5, 023 sa mga ini ang mga OFW samtang 1, 343 sa ila ang dependents kag may ara man sang turista kag iban nga overseas Filipinos.
Pinakadako nga numero sang mga na-repatrite ang nagikan sa Dubai, ginsundan ini sang Kuwait, Abu Dhabi, Qatar, Bahrain, Riyadh, Al Khobar, Israel, Jeddah kag Oman.
Magluwas diri, may ara naman nga mga OFW halin sa Middle East ang ginaluman nga maga-abot sa pungsod subong nga adlaw kag masunod nga semana.
