Luyag siguraduhon ni Iloilo City Mayor Raisa Trenas nga preparado ang syudad sa tion nga magluntad na ang El Niño phenomenon.
Sa interview sang Bombo Radyo kay Mayor Trenas, iya ginpahayag nga indi lang ini ordinary nga phenomenon bangud isa ini ka Super El Nño.
Suno sa alcalde, ini ang nagapanguna nga rason kun ngaa nagpapanaug siya sang Executive Order no. 41 nga nagatukod sang Iloilo City Water Coordination Task Force bilang sentro sang city government kag water service providers.
Ang Task Force ginapamunuan sang alcalde samtang ang vice chairperson amo si Engr. Mavi Gustilo,ang head sang Office of the Building official kag newly appointed OIC City Engineer.
Ang mga myembro ginabug-usan sang pila ka heads sang mga opisina sa syudad kag mga tiglawas halin sa mga water providers kag bulk water suppliers.
Isa na diri si Mr. Rogelio Florete Jr., ang president kag CEO sang Flo Water Resources Iloilo Inc.
Nagaserbe naman nga consultant si Former Senator Franklin Drilon.
Base sa nasaad sa Executive Order, katungdanan sang task force ang pag-develop sang mga strategic plans agud i-address ang water supply distribution issues sa syudad.
Maga-facilitate man ini sang koordinasyon sa streamline efforts sa water supply kag distribution reliability.
Magapatigayon man ini sang regular inspection kag meetings agud ma -assess ang progress kag ma-address ang mga concerns para makahimo sang solusyon.
Ang financial requirements nga kinahanglanon sa operasyon ang kuhaon sa available nga pondo sa city government nga isubject sa regular nga pagsulundan sa accounting kag auditing.
