Nagsabat si Senator Rodante Marcoleta nga ginatuyo siya nga pahipuson paagi sa rekomendasyon nga kasuhan siya sang plunder kag indirect bribery.
Ini ang kaangot sa ginrekomendar sang field investigators sang Ombudsman nga pagpasaka sang panumbungon nga plunder kag indirect bribery batok sa iya, kay former Anakalusugan Partylist Rep. Mike Defensor, kag mga negosyante nga sanday Joseph Varias Espiritu kag Aristotle Baluyut Viray.
Kasunod ini sang P75 million nga campaign donation sang nagpadalagan si Marcoleta sa 2025 elections.
Sa iya nga privilege speech, ginpahayag sang senador nga subong pa lamang, ihambal na sini nga napalpak ang amo nga tuyo bangud indi siya maghipos.
“If the intention of these cases is to silence me, let me say this at the beginning. It has failed. I will not be silenced,” suno sa senador.
Ginkwestyon sini ang timing sang panumbungon.
Pahayag sini, nag-abot ang reklamo sang ginahana nga buksan liwat ang imbestigasyon sa flood control projects kag buot naman nga mag-umpisa ang impeachment trial batok kay Vice President Sara Duterte.
“The trumped-up charges filed against me and some of my friends are not merely legal accusations. They form part of a deeper and more nefarious design— to intimidate independent voices, to punish dissent, and to warn every senator that the price of asking hard questions could lead to personal damnation,” pahayag pa ni Marcoleta.
Dugang ni Marcoleta, magasabat siya sa alegasyon sa husto nga forum.
“Let the complaint be examined, let the evidence be tested, let the law speak. I will answer in the proper forum with documents, with facts,” kabahin sang iya speech.
Kun kaisa suno kay Marcoleta, kinahanglan nga i-bend ang layi kaangay anay sang ginhambal ni anay Department of Justice (DOJ) kag subong Ombudsman Jesus Crispin “Boying” Remulla.
“Someone said sometimes you need to bend the law. Am I right, Secretary Remulla, now, Ombudsman?” pahayag ni Marcoleta. “Sabi niya yes, sir. So kaya nilang baluktutin lahat. They can imprison me, they can arrest me, but they will not win. Itaga nila yan sa bato (remember that),” dugang pa sini.
Sandig sa investigation sang Field Investigation Bureau sang Ombudsman, gin-ako mismo ni Marcoleta nga nakabaton siya sang P75 million nga kwarta sang ginpamangkot siya sang Commission on Elections (Comelec).
Ini nga kantidad suno sa mga imbestigador ang indi makabig nga simple lamang nga akto sang kaalwan kundi kurapsyon agud nga makakuha sang pabor halin kay Marcoleta.
Wala man gindeklarar ni Marcoleta ang amo nga kuwarta sa iya nga Statement of Contributions and Expenditures ukon SOCE.#
