Isa ka dungog kag isa ka pagpanghangkat para sa isa sa mga apo ni General Martin Teofilo B. Delgado ang pagkilala sa pagkabaganihan sang ila Lolo kadungan sang 128th Independence Day subong nga adlaw, Hunyo 12.
Sa interview sang Bombo Radyo kay Sta. Barbara Sangguniang Bayan Member Ma. Christine Marie Delgado Robles, iya ginpahayag nga isa gid ka daku nga bugal sa ila pamilya ang hinimuan ni General Delgado bilang isa ka freedom fighter.
Bilang public servant suno kay Robles, inspirasyon man niya ang iya nga Lolo sa pagpangalagad sa mga pumuluyo sang ila nga banwa.
Gintawag niya ini nga iya “icon” sa pagserbisyo.
Ginpaambit man sini nga lain na ang patag-awayan subong kag lain na nga klase sang away ang kinahanglan dag-on kaangay sang away sa energy crisis kag illiteracy.
Nahibaluan nga ang komemorasyon sang Independence Day sa maragtason nga banwa sang Sta. Barbara ang nag-highlight sa mga legasiya ni General Delgado lakip na ang papel sini para sa pagpakig-away sang pungsod para sa kahilwayan.
Si General Delgado amo ang nanguna sa kahilwayan sang Iloilo halin sa mga Espanyol kag nagserbe man bilang general-in-chief sang Visayan revolutionary forces.
