Ginpaguwa sa group match sa FIFA World Cup 2026 ang isa ka Paraguay midfielder bangud sa pagtabon sang iya nga baba samtang nga naga-istorya sa isa man ka player sang kasumpong nga team.
Natabo ini sa nagapadayon pa subong nga matchup sa tunga sang Paraguay kag Turkey sa Group D sa Levi’s Stadium sa San Francisco Bay Area, USA.
Antes ang halftime, may ginhambal si Miguel Almirón sang Paraguay sa player sang Turkiye nga si Mert Müldür. Samtang nagahambal, ginatabunan sini ang iya baba.
Gilayon nga gin-reklamo ni Müldür ang akto ni Almirón.
Bangud sini, nag-check ang referee sa monitor kag matapos ang malip-ot nga review, ginpaguwa ang RED CARD batok kay Almiron.
Siya ang labing-una nga player sa FIFA World Cup nga nahatagan sang red card bangud sa pagtabon sang iya baba samtang nagahambal — isa ka patakaran nga bag-o lang napatuman.
SA DIIN NAGHALIN INI NGA PAGSULUNDAN?
Sang nagligad lamang nga Abril, gin-anunsyo sang International Football Association Board ang bag-o nga patakaran nga maga-cover pati na sa FIFA World Cup.
Ang amo nga pagsulundan nagasiling nga ginadumilian ang players nga tabunan ang ila nga baba kun may mga komprontasyon batok sa ila nga kasumpong sa pitch. Kun may violation, awtomatiko nga may i-isyu nga red card.
Nag-umpisa ini nga pagsulundan sa away nanday Vinícius Júnior sang Real Madrid kag Gianluca Prestianni sang Benfica sang Pebrero kadungan sang playoff game sa Champions League.
Sang amo nga tion, naka-score si Vinicius sang una nga goal sa 50th minute sang game. Bangud sang iya pagsaot samtang naga-selebrar sang iya goal, naakig ang fans sang Benfica.
Didto kag nagpalapit si Prestianni kay Vinícius apang samtang nagahambal, ginatabunan sini ang iya baba sang iya jersey.
Naakig naman si Vinícius kag ginpalapitan sini ang referee.
Pagkadugay-dugay, nag-gesture ang referee — isa ka protocol nga naga-indikar nga may alegasyon sang racist abuse. Gin-untat ang hampang kag ginlunsar ang imbestigasyon. Wala gilayon sang tikang nga ginhimo ang officials sang amo nga tion bangud sang kakulang sang ebidensya.
Pagkatapos sang hampang, gin-alegar ni Vinicius nga may pagpanghikay ukon racial slur nga ginhambal si Prestianni sa iya — bagay nga gin-deny naman ni Prestianni.
Gin-apinan pa ni Kylian Mbappé ang iya Real Madrid teammate sa interviews kag nag-alegar nga nabatian niya si Prestianni nga gintawag si Vinícius nga daw amo (monkey) sang makalima gid ka beses.
Bisan sang ano nga pagpanginwala ni Prestianni, gin-suspend siya sang UEFA nga amo ang governing body sang football sa Europe.
Nangin bantog ang amo nga hitabo tubtub nga ginsuportahan man ni FIFA President Gianni Infantino ang suhestyon nga pagwa-on ang isa ka player kun may mga kaso kaangay sang racist abuse.#
