Nataktak na ang Cabo Verde sa FIFA World Cup 2026 apang nagbilin sila sang daku nga marka indi lamang sa pitch kundi sa bug-os nga football history.
Nagdangat sa extra-time kag diutayan lang nakahimo sang tuman ka daku nga upset ang team batok kanday Lionel Messi kag Argentina sa Round of 32 apang nakalampuwas sanday Messi, 3-2.
Walo ka saves ang nahimo sang 40-anyos nga goalkeeper sang Cape Verdeans nga si Vozinha sa 90 minutos nga regulation time.
Sila man ang una nga African nation nga naka-score sang masobra isa ka goal batok sa defending World Cup champions sa isa ka match sa tournament.
Nangin ikaduha sila sa pinakagamay nga pungsod nga naka-qualify para sa World Cup kag nakaabot sa tournament pila lamang ka bulan pagkatapos nila ginsaulog ang ika-50 nga anibersaryo sang ila independensya halin sa Portugal.
Nangin daku ang suporta sang gobyerno sang Cape Verde sa ila national team lakip na ang paghatag sang diretso nga mga biyahe sa eroplano agud makapahuway sang maayo ang players.
Magluwas diri, gingamit man sang ila national government ang programa sang FIFA Forward agud mapauswag ang imprastruktura sang football sa pungsod.
Sang nagsulod ang Cape Verde sa tournament, isa lamang ka porsyento ang ginalantaw nga tsansa nila nga makaabante halin sa group stage. Apang natapos nila ini nga wala sing kapierdehan pagkatapos makarekord sang tatlo ka draw — batok sa former world champions kag reigning European champions nga Espanya, batok sa two-time world champions nga Uruguay, kag batok sa Saudi Arabia.
Ang amo nga mga resulta nagtugot sa Cape Verde nga makaabante sa Round of 32. Sila ang pinakagamay nga nasyon nga naka-qualify sa knockout rounds sa World Cup.#
