Ginpasugtan sang Senate Impeachment Court ang pangabay sang House Prosecution Panel nga magpaguwa sang subpoena para sa bank kag tax records ni Vice President Sara Duterte amo man sang iya bana nga si Atty. Manases Carpio, kag sang pila nila ka negosyo.
Ang ini nga mga dokumento pagagamiton sa pag-usisa sang akusasyon nga may yara sang wala maeksplikar nga manggad ukon unexplained wealth sa Article II sang impeachment complaint batok sa bise presidente.
Suno kay Impeachment Court Presiding Officer Francis “Chiz” Escudero, ginbasehan nila ang desisyon sa nahimo sang impeachment trial ni anay Chief Justice Renato Corona sang 2012, sa diin ginpasugtan man ang pagkuha sang bank records.
Ginsugo ang mga bangko nga isumiter ang mga dokumento sa Clerk of Court sa Hulyo 30, alas-9 sang aga.
Ginpahayag ni Escudero nga klaro kag importante ang mga dokumento para sa imbestigasyon sang kaso.
Lakip sa ginpasugtan ang bank records ni Vice President Duterte kag sang iya bana, bangud kinahanglan nga ipahibalo sang mga opisyal sang gobyerno ang ila mga asset kag pati sang ila asawa ukon bana suno sa nakabutang sa Republic Act 6713.
Apang ginklaro sang korte nga ang subpoena nagalakip lamang sang peso-denominated accounts nga may kaangtanan sa Article II.
Buot silingon, wala diri nalakip ang foreign currency accounts ukon ang yara sa luwas sang pungsod magluwas lang kun may written consent ukon may pahanugot halin sa tag-iya sang account.
Ginpasugtan man sang korte ang pagkuha sang mga rekord halin sa Anti-Money Laundering Council ukon AMLC, apang ini pagatan-awon lamang sang korte ukon in camera sa presiding officer paagi sa clerk of court agud maprotektahan ang sensitibo nga impormasyon.
Sa pihak nga bahin, ginbalibaran sang impeachment court ang pangabay nga ipa-subpoena man ang rekord sang JTC Group of Companies kag Pikimong Pikimong Philippines Corporation, bangud wala sang nagakaigu nga ebidensya nga nagapakita nga may direkta nga kaangtanan si Vice President Duterte ukon ang iya bana sa sini nga mga kumpanya.
Ginpasugtan man sang korte ang subpoena sa Bureau of Internal Revenue para sa tax records ni Duterte, nga kinahanglan man isumiter sa Hulyo 30.
Gin-deny man liwat ang request sa subpoena para sa JTC Group of Companies kag Pikimong Pikimong Philippines Corporation bangud sang “failure to satisfy the requirement of prima facie relevance.”
Pagkatapos nga nabasa ang ruling, nagpahayag si Senator-Judge Alan Peter Cayetano nga magapasa siya sang written dissent batok sa ruling ni Presiding Officer Chiz Escudero nga nagatugot sang pag-isyu sang subpoena sa bank records ni Vice President Sara Duterte. Ang nagkumpirma nga maga-upod sa iya dissent amo sanday Senator-judges Loren Legarda, Imee Marcos, kag Camille Villar.
