Ginapaabot nga mas mahal nga plete sa eroplano ang kinahanglan nga bayran sang mga pasahero sa una nga 15 ka adlaw sa Agosto.
Ini matapos nga ginpasaka sang Civil Aeronautics Board ukon CAB ang passenger fuel surcharge sa Level 13 para sa mga biyahe halin Agosto 1 tubtob 15.
Mas mataas ini sa Level 8 nga ginapatuman subong nga Hulyo 16 tubtob 31.
Sa idalom sang bag-o nga level, ang fuel surcharge sa mga domestic flights magasaka sa P423 tubtob P1,237, depende sa kalayuon sang biyahe. Samtang sa international flights nga nagahalin sa Pilipinas, magalab-ot ini sa P1,396.74 tubtob P10,385.42.
Suno sa CAB, ang pagsaka sang fuel surcharge ang kasunod man sang pagtaas sang presyo sang jet fuel sa pangkalibutan nga mercado kasunod sang pag-ibwal na naman sang tensyon sa Middle East.
Ang fuel surcharge wala nalakip sa base airfare kag mahimo nga magasaka ukon maganubo depende sa presyo sang jet fuel sa merkado.
