Nagapanguna gihapon sa ginakabalak-an sang mga Pilipino ang pagkontrol sa presyo sang mga nagapanguna nga balaklon.
Base sa survey sang OCTA Research nga ginpatigayon sang Hulyo 4 tubtob 11, 37 porsyento sang mga respondents ang nagasiling nga ang inflation ukon pagsaka sang presyo sang mga balaklon amo ang isa sa ila tatlo ka pinakamabug-at nga concern.
Mas manubo ini sang walo ka puntos halin sa 45 porsyento sang Marso.
Sa survey, ang mga taga-Visayas ang may pinakamataas nga kabalaka sa inflation nga may 42 porsyento kag ginasundan sang Balance Luzon nga may 41 porsyento.
Nagapanguna man ang inflation bilang ginakabalak-an sang Class ABC sa 41 porsyento, Class E sa 40 porsyento, kag Class D sa 36 porsyento.
Nagasunod sa concern amo ang panawagan para sa pagsaka sang sweldo sa 34 porsyento, kag ginasundan sang panawagan sa pagtapna sa korapsyon nga may 32 porsyento.
Lakip man sa iban nga ginakabalak-an ang barato nga pagkaon, libre kag de-kalidad nga edukasyon, pagtapna sa iligal nga druga, pagnubo sang presyo sang bugas, pagtanyag sang dugang nga trabaho, kag pagpahagan-hagan sang kapigaduhon.
Suno sa OCTA Research, ang padayon nga kabalaka sang publiko sa sweldo nagapakita nga para sa madamo nga Pilipino, wala nagadungan ang pagsaka sang ila kita sa padayon nga pagsaka sang gasto sa adlaw-adlaw nga pagpangabuhi.#
