Napabilin sang Tropical Depression Maymay ang kusog sini samtang yara sa nakatundan sang Luzon.
Sa 2:00 a.m. weather bulletin sang Philippine Atmospheric, Geophysical and Astronomical Services Administration (PAGASA), ulihi nga nakit-an ang sentro sang bagyo sa kalayuon nga 140 km West Northwest sang Bacnotan, La Union.
Dala sini ang kabaskugon sang hangin nga 55 km/h malapit sa sentro kag pagmadlos nga tubtub sa 70 km/h. Halos wala nagahulag ang bagyo subong suno sa PAGASA.
Napasaka naman sa Wind Signal No. 1 ang Ilocos Norte, Ilocos Sur, La Union, Pangasinan, Apayao, Abra, Kalinga, Mountain Province, Ifugao, Benguet, Cagayan, Isabela, Quirino, Nueva Vizcaya, northern portion sang Zambales, northern portion sang Tarlac, northern portion sang Nueva Ecija, kag northern portion sang Aurora.
Gina-forecast nga magahulag ang bagyo pa-nasidlangan kag maga-landfall sa Ilocos Sur ukon sa La Union karon sa hapon ukon sa gab-i. Pagkatapos, magalabay ang bagyo sa Northern kag Central Luzon tubtub bwas.
Ginalantaw nga magabaskog ini samtang nagalapalapit sa duta kag maglab-ot sa tropical storm category sa masunod nga 12 oras.
Kun maka-landfall na, magahina ini liwat kag magabalik sa tropical depression bwas sa aga kag mahimo nga mapanubo sa low pressure area sa bwas sa hapon ukon sa gab-i.
Sa pihak nga bahin, padayon man nga gina-monitor sang PAGASA ang Typhoon Dolphin nga subong yara pa sa guwa sang Philippine Area of Responsibility (PAR).
Ulihi ini nakit-an sa kalayuon nga 1,970 km nasidlangan naaminhan-nasidlangan sang Extreme Northern Luzon. Posible man suno sa weather bureau nga mapasaka ang wind signal sa Batanes bangud sa Dolphin.
Sa masunod nga adlaw, ginalantaw nga higupon sang Bagyo Dolphin ang Bagyo Maymay gani ginalantaw nga matunaw ini, apang pabaskugon naman sini ang Habagat ukon ang Southwest Monsoon sa masunod nga duha ka adlaw.
