Wala sang plano ang gobyerno nga magpatuman sang temporary ban sa pagpasulod sang imported nga bugas bisan nagahilapit na ang tig-alani sang humay sa pungsod.
Suno kay Agriculture Secretary Francisco Tiu Laurel Jr., padayon ang pag-import sang bugas agud masiguro nga may bastante nga suplay samtang nagapreparar ang pungsod sa posible nga malala nga epekto sang El Niño sa ulihi nga bahin subong nga 2026.
Ginpahayag niya nga kinahanglan may yara sang bastante nga buffer stock nga magasuporta sa kinahanglanon sang pungsod sa bugas halin Disyembre tubtob Abril sang masunod nga tuig.
Sa pinakabag-o nga datos, naglab-ot na sa kapin 3.3 milyon ka metric tons ang imported nga bugas nga kabahin naman sang preparasyon sa tig-ululan.
Agud buligan ang mga mangunguma, handa naman ang National Food Authority ukon NFA nga magbakal sang tubtob 500,000 metric tons sang lokal nga humay sa idalom sang ginpasangkad nga programa sa procurement para sa wet season.
Nagtalana man ang Department of Agriculture sang mga P20-billion nga pondo para sa pagbakal sang lokal nga humay sa sini nga tuig nga mas mataas sang sobra doble ipaanggid sa P9-billion nga budget sang nagligad nga tuig.
