Nagpalab-ot sang “happy trip” nga mensahe si National Bureau of Investigation (NBI) Director Melvin Matibag kay Rep. Leandro Leviste.

Ini matapos makumpirma sang Bureau of Immigration nga nagbiya sa Pilipinas sanday Leviste kag iya iloy nga si Senator Loren Legarda sang Agosto 2 paagi sa separado nga flights.

“Mag-ingat siya sa biyahe n’ya. Happy trip sa kaniya. Sabi nga ni Gen. Torre, ‘Ingat po sa biyahe,” suno kay Matibag. “At dahil papunta siya [Rep. Leviste] ng France, bon voyage!”

Natabo ang byahe apat ka adlaw antes gin-subpoena si Leviste sang NBI para mag-atubang sa imbestigasyon sa alegasyon nga may plano nga pag-frame kay Executive Secretary Ralph Recto gamit ang ginapahayag nga indi matuod nga sexual abuse kag drug allegations.

Nagbiyahe man sanday Leviste kag Legarda pila lang ka adlaw matapos gin-anunsyo sang Ombudsman ang plunder kag graft complaints batok sa ila.

Wala pa sang kaso subong nga amo ang nagapugong sa senador kag kongresista sa pagbiyahe sa gwa sang pungsod, bangod ang mga reklamo yara pa lamang sa preliminary investigation sa Ombudsman kag wala nagakahulugan dayon sang travel ban.

Kinahanglan anay sang Ombudsman nga magpangayo sang hold departure order sa korte antes mapatuman ang travel restriction.

Ginkumpirma man ni Matibag nga sanday Legarda kag Leviste naghalin sakay sang magkalain-lain nga flights nga nag-agi sa Hong Kong kag ang France amo ang ginapahayag nga ila final destination.

RELATED ARTICLESMORE FROM AUTHOR