Usisaon sang mga imbestigador pati ang gaming kag messaging history sang bata nga suspek sa pagpangluthang sa sulod sang Ateneo de Zamboanga University-Tumaga Campus.
Ini agud matukiban kun ano ang posible nga nagtulod sa iya sa paghimo sang krimen.
Suno kay Interior Secretary Jonvic Remulla, ginatan-aw sang mga otoridad ang kompleto nga gaming history kag chat history sang bata bilang kabahin sang forensic investigation.
Sa video sang insidente, makita ang mga estudyante nga nahadlok kag nagpanago sa idalom sang ila mga lamesa samtang mabatian ang mga lupok sang armas.
Samtang, antes nagpanginmatay ang suspek, gin-live stream mismo sini ang insidente sa first-person point of view nga talalupangdon nga daw kaangay sang presentasyon sa isa ka video game.
“We are checking his complete gaming history, his chat history, so we cannot come up with a complete answer on what…the complete forensic analysis on why this happened,” suno kay Remulla.
Duha ka tawo ang napatay sa insidente—isa ka Grade 10 nga estudyante kag ang mismo nga shooter nga estudyante man sang amo nga buluthuan.
Base sa inisyal nga pahayag sang kapulisan, ginapahayag nga nakasulod sa eskwelahan ang suspek nga may dala nga duha ka armas lakip ang regular pistol kag isa nga may conversion.
Narekober man sang mga imbestigador ang bag nga ginasuspetsahan nga gin-gamit sa pagdala sang mga armas sa sulod sang eskwelahan, lakip ang isa ka ammunition magazine.
Samtang, gin-relieve sa iya pwesto ang isa ka opisyal sang Bureau of Customs sa probinsya nga amay sang suspek. Ini matapos makumpirma nga ang isa sa mga armas nga gin-gamit sang suspek amo ang nakapangalan kag rehistrado sa Customs official.
Padayon pa ang imbestigasyon sang kapulisan, lakip ang pag-review sang tanan nga CCTV footage kag mga statement sang mga nakasaksi, agud matul-id ang bug-os nga detalye sang insidente.
Ginpanawagan man ni Remulla sa publiko nga ipaiway anay ang politika kag unahon ang seguridad sang mga kabataan, samtang ginmanduan man ang mga gun owner nga mangin responsable sa pagtipig kag paggamit sang ila armas.
Nag-apelar naman ang Cybercrime Investigation and Coordinating Center ukon CICC sa publiko nga indi na mag-repost ukon magpaalapta sang mga litrato, video kag iban pa nga content nga may kaangtanan sa amo nga insidente.
“Nanawagan kami sa netizens na huwag na i-repost ang mga video kaugnay ng insidente upang hindi na rin mabigyan ng karagdagang audience o atensyon ang ganitong uri ng karahasan,” suno kay CICC Undersecretary Renato Paraiso.
Ginpangabay man ni Paraiso ang mga ginikanan nga tutukan kag bantayan ang online activities sang ila mga kabataan, ilabi na ang mga menor de edad nga nagagamit sang social media kag gaming platforms.
“Panatilihin natin ang bukas na komunikasyon sa ating mga tahanan. Alamin natin kung ano ang kanilang pinapanood, sinusundan at kinokonsumo online,” dugang sini.#
