Ginpaathag sang isa ka psychologist nga importante nga ang mga ginikanan ang makahatag sang mas madamo nga quality time sa ila mga kabataan agud malikawan nga matuon ang tanan nga atensyon sang mga ini sa social media kag gadgets.
Sa interview sang Bombo Radyo kay AJ Sunglao, isa ka licensed psychologist kag global mental health consultant, iya ginpahayag nga importante nga may regular nga one-on-one time ang parents kag ila mga bata ilabi na sa tion sang pagkaon ukon paghimo sang mga buluhaton sa sulod sang balay.
Suno kay Sunglao, dapat ibalik ang nakaangdan nga gina-upod ang mga kabataan sa simple nga household chores pareho sang paghugas sang pinggan kag pagpanglimpyo agud may tion sila nga mag-istoryahanay kag mapabaskog ang koneksyon bilang isa ka pamilya.
Pahayag pa niya, dapat man nga mas tutukan sang mga ginikanan ang online activities sang ila mga bata ilabi na kon sin-o ang mga tawo nga kaupod kag ginaistorya sang mga ini online.
Ginpahayag man sang psychologist, indi kinahanglan nga kuhaon gid ang gadgets sa mga bata apang dapat balansehon ang online kag offline nga kabuhi sang mga ini paagi sa mas madamo nga family activities, pag-istoryahanay kag quality time sa isa kag isa.
Dugang pa niya nga daku ang epekto sa bata sang maayo nga relasyon kag koneksyon sang ginikinan sa ila.
