Ginkumpirma sang House prosecution nga lima na lamang ka mga witnesses ang nabilin nga ila i-presenter.
Suno kay lead prosecutor kag Representative Gerville Luistro, target sang prosecution nga matapos ang ila pagpresentar sang mga witness sa Miyerkules nga adlaw, Setyembre 9.
Lakip sa lima ka nabilin nga mga witness amo sanday anay Department of Education Special Disbursing Officer Edward Fajarda; ang iya asawa nga si DepEd Assistant Secretary Sunshine Charry Fajarda; Philippine Statistics Authority Assistant National Statistician Marizza Grande; Police Major Jovelyn Magay; kag Commission on Audit employee Bresilio Sabaldan.
Ang una nga impeachment article batok kay Duterte may kaangtanan sa ginapahayag nga sala nga paggamit, mis-appropriate, kag iregular nga liquidation sang masobra 612.5 million pesos nga confidential funds.
Lakip diri ang 500 million pesos halin sa Office of the Vice President kag masobra 112million ka pesos halin sa DepEd sang panahon nga si Duterte pa ang Education Secretary.
Samtang, indi pa sigurado kun makatestigo si Edward Fajarda matapos siya ma-stroke.
Suno sa prosecution, ginatalakay nila sang depensa kon posible nga indi na siya mag-atubang sa witness stand agud indi maapektuhan ang iya kahimtangan.
Ginpahayag man sang prosecution nga mahimo nila nga indi na ipatawag ang pila ka anay opisyal bilang mga witness bangud nagapati sila nga bastante na ang ebidensya nga ila napresentar sa korte.
