Ginpunto sang isa ka legal strategist mga mangin debatable lamang ang isyu sa voting threshold sa impeachment trial ni Vice President Sara Duterte kun may senador nga nagresign, napatay ukon indi na myembro sang Senado.
Sa interview sang Bombo Radyo kay Atty. Dan Cartagena, iya ginpahayag nga indi dapat pagbag-uhon ang kinahanglan nga boto base lamang sa spekulasyon bangud wala ini ginabaton sa legal arguments.
Suno pa kay Cartagena, wala ginpahalin kag dululungan nga nagpanumpa ang mga senator-judges sang adlaw nga nag-umpisa ang trial.
Pahayag pa sini nga indi dapat pagkakson sang senado ang iban nga senador agud mabuhinan ang numero nga pagabasehan sang two-thirds requirement kun sa diin 16 ka opisyal ang kinahanglan agud ma-impeach si VP Sara.
Gindugang pa sini nga indi buot silingon nga wala na nagatambong ang iban nga senador, wala nagakahulugan nga wala na sila sang katungdanan sa impeachment.
Nahibaluan nga may pila ka mga senador ang sa subong wala nagatambong sa trial, isa na diri amo si Senator Ronald ”Bato” Dela Rosa nga padayon sa gihapon nga ginapangita.
Samtang, may ara naman sang ginapangatubang nga kaso sanday Senator Rodante Marcoleta kag Senator Jinggoy Estrada nga napreso man subong bangud sa kaso sang mga ini sa idalom sang Anti-Graft Law ukon Anti-Plunder Law.
Nagdugang man diri sanday Sen. Loren Legarda kag Senator Pia Cayetano kag Sen. Alan Peter Cayetano nga nagpadulong man sa luwas sang pungsod.
Pahayag pa ni Atty Cartagena nga indi dapat maghatag sang konklusyon sa iban nga senator-judges nga sa subong indi pa makatambong bangud madamo pa sang posibilidad nga makapartisipar ang mga ini sa tion ukon adlaw sang pagbotohay.
