Nabastusan si Iloilo 1st District Rep. Janette Garin sa paagi sang defense lawyer nga si Atty. Mark Vinluan sang gin-cross-examine sini ang testigo nga si retired Sandiganbayan presiding justice Amparo Cabotaje-Tang.
Si Cabotaje-Tang amo ang una nga testigo kag ginakabig “surprise witness” nga ginpresentar sang prosecution panel kahapon, Septyembre 14, sang nagsugod na ang proceedings sa Article II kaangot sa unexplained wealth ni Vice President Sara Duterte.
Suno kay Garin, nakahibalo siya nga maalam nga abogado si Atty. Vinluan, apang nakit-an sini nga “medyo bastos” ang paagi sini sa pagpamangkot.
Partikular nga namunuhan ni Garin ang pagpamangkot ni Vinluan kay Cabotaje-Tang kun “Kakampink” bala ini ukon kun anti-Duterte.
“Nagtataka kami kanina, with due courtesy of course sa ating defense lawyer kay Mark Vinluan, na tila parang, sa interpretasyon ko bilang isang babae, medyo bastos ‘yung kanyang manner of cross-examining the witness,” suno sa Ilongga nga kongresista.
“Kasi nandun yung katanungan, Kakampink ka ba? Eto galit ka ba sa ganito? Parang pinipilit siyang sumagot ng mga bagay na alam naman natin na ang presensiya niya sa impeachment court ay para magbigay ng intepretasyon sa mga batas sang-ayon sa kanyang experience,” dugang sini.
Nahibaluan nga kahapon, ginkwestyon ni Vinluan si Cabotaje-Tang agud mabisto kun may political leaning ini.
Ginpamangkot man sini kun mag-abyan ang retired justice kag si Akbayan Partylist Rep. Chel Diokno nga amo ang prosecutor nga nagpanguna kahapon sa presentasyon sang Article II.
“But are you anti-Duterte? Do you like VP Sara? Kakampink po ba kayo?” kabahin sang isa-isa nga pamangkot sang defense lawyer.
Ginpanindugan naman ni Cabotaje-Tang nga “apolitical” siya halin sang una, kag sa pagkamatuod, nagkontrahanay pa sila sang una ni Diokno sa mga kaso sa korte.
“I don’t know her personally… I’ve never been political in my life. I have always been apolitical,” kabahin sang mga sabat sang testigo.#
