Nag-isyu sang subpoena ang Department of Justice (DOJ) kay Senator Robin Padilla may kaangtanan sa obstruction of justice complaint nga ginpasaka sang Philippine National Police (PNP).
Nalakip sa reklamo ang alegasyon nga ginbuligan ni Padilla si Senator Ronald “Bato” Dela Rosa nga makaguwa sa Senate premises samtang ginapatuman ang arrest warrant sang International Criminal Court (ICC) batok sa iya.
Suno sa DOJ, ginserbehan sang subpoena si Padilla kag si Lieutenant Colonel Jean Alla Yasin Robles sa Senado 2:30 kaina sang hapon. Ginmanduan ang senador nga mag-atubang sa panel of prosecutors kag magpasaka sang iya counter-affidavit sa Septyembre 25 kag Oktubre 9.
Sa separado nga Facebook post ni Padilla, ginkumpirma sini nga may subpoena: “A subpoena has arrived.”
Matandaan nga ginpasaka sang PNP-Criminal Investigation and Detection Group ang reklamo sang Mayo batok kay Padilla kag sa iban pa bangod sa alegasyon nga ginbuligan sini si Dela Rosa nga makalikaw sa pagdakop sa iya sang awtoridad.
Sang Mayo 11, gintinguhaan sang mga ahente sang National Bureau of Investigation (NBI) nga iserbe ang arrest warrant kay Dela Rosa nga nagresulta sa pagdalagan sini pasulod sang Senate building.
Sa idalom sang anay liderato ni former Senate President Alan Peter Cayetano, ginhatagan anay si Dela Rosa sang protective custody sa upper chamber apang may natabo nga “shooting incident” sang Mayo 13 sang gab-i kag nakaguwa siya sa Senate premises sang Mayo 14 sang kaagahon.
Ginpanginwala ni Padilla nga ginbuligan niya si Dela Rosa nga makapalagyo. Paathag sini, naghingyo lamang ang former police chief nga makasakay sa iya salakyan pakadto sa gwa sang Senado.
Suno sa PNP, nakita si Dela Rosa nga nagaguwa sa Senate premises sakay sang salakyan nga nakarehistro kay Padilla—isa ka puti nga Toyota Fortuner.
Gin-ako man ni Padilla nga iya ang amo nga salakyan, apang pahayag niya, kinahanglan hulaton ang resulta sang imbestigasyon para mahibaluan kun yara si Dela Rosa sa sulod sini.
Nahibaluan nga nagapangatubang man siya sang obstruction of justice complaint sa Office of the Ombudsman bangud sa amo man nga alegasyon.#
