Nakumpiskar ang 35 cellular phones, 1 vape cigarette, 1 cellphone charger, kag 4 ka SIM card starter packs sa mga gamit sang Person Deprived of Liberty ukon PDL sa Iloilo City District Jail Male Dormitory sa Brgy Ungka, Jaro, kahapon nga adlaw, Setyembre 16.
Ini matapos nagpatigayon sang joint surprise greyhound operation ang Bureau of Jail and Management and Penology 6 (BJMP-6) kag Philippine Drug Enforcement Agency 6 (PDEA-6) sa nasambit nga presohan.
Kabahin man sa operasyon ang drug testing sa 45 ka mga PDL nga nangin negatibo man ang ila nga mga resulta.
Sa interview sang Bombo Radyo kay Atty. Juniven Rey Umadhay, spokesperson sang BJMP-6, iya ginpahayag nga ang ginpatigayon nga operasyon ang masiguro ang seguridad sang jail facility kag matapna ang mga kontrabando lakip na ang mga communication devices nga mahimo magamit sa ilegal nga transaksiyon sa sulod sang presohan.
Suno sa iya, padayon ang ila nga imbestigasyon agud mahibaluan kun paano nakasulod ang mga nasambit nga mga ginadumilian nga kagamitan sa sulod sang presohan.
Pahayag man niya, kung mapamatud-an nga may ara sang connivance sa mga personnel sang BJMP, posible nga ma-dismiss ang mga ini sa serbisyo kag possible man nga pasakaan sang kaso nga negligence of duty.
Dugang pa ni Atty. Umadhay, wala ginatolerar sang ahensya ang iligal nga buluhaton sa ila nga mga personnel.
