Posible nga mas mangin masami ang brownout kag posible man nga magasaka ang balayran sa kuryente sa tion nga maeksperyensyahan na sang Pilipinas ang “super El Niño.”
Suno kay Energy Secretary Sharon Garin, mahimo nga maapektuhan sang malawig kag tuman nga kainit ang coal-fired power plants samtang mahimo man magkulang ang tubig nga ginagamit sang mga hydroelectric power plants.
Ginpahayag ni Garin nga gina-monitor sang Department of Energy (DOE) kaupod ang Energy Regulatory Commission ukon ERC, ang electricity spot market para mapunggan ang posible nga pag-abuso sang mga power industry players.
Suno sa ERC, sang Agosto, naglab-ot sa halos 20 pesos kada kilowatt-hour ang presyo sang kuryente sa spot market sa Visayas kag Mindanao antes nag-intervene ang ahensya.
Nagapangabay naman si Garin sa publiko nga magkinot sa paggamit sang kuryente kag magpatuman sang mga energy-saving measures.
Samtang, suno sa National Disaster Risk Reduction and Management Council ukon NDRRMC, yara na sa 106 ka mga siyudad kag banwa sa lima ka rehiyon ang nagdeklarar nga yara sa state of calamity bangod sa El Niño.
Kapin 5.4 bilyon pesos na ang kabug-usan nga halit sa agrikultura, kag pinakadaku sini ang halit sa Cagayan Valley nga naglab-ot sa kapin 4.9 bilyon pesos.
Sa bug-os nga pungsod, kapin 388,000 nga mga tawo ang apektado sang El Niño, samtang kapin P39-million nga food kag non-food assistance ang nahatag na sa 24,618 ka mga pamilya.
Samtang, nagpatuman man sang mga tikang ang Philippine National Police (PNP) para maprotektahan ang mga pulis sa sobra nga kainit. Ginmanduan ni PNP Chief General Jose Melencio Nartatez Jr. ang mga police commander nga masiguro nga may access sa tubig kag nagakaigo nga protective gear ang ila mga personnel.
Ang Department of Health (DOH) naman nagapanagtag sa mga local government unit sang El Niño toolkits nga nagalakip sang impormasyon parte sa mga balatian nga dapat bantayan samtang gina-project nga magapadayon ang El Niño tubtob sa masunod nga tuig. Suno kay Health Secretary Edwin Mercado, nagadugang ang mga kaso sang heat stroke, dengue, cholera kag typhoid bangod sa epekto sang sini nga phenomenon.#
