Daku ang nabulig sang newborn screening sa temprano nga pagkahibalo sang kondisyon sang bata ni Faye Amado nga may Maple Syrup Urine Disease ukon MSUD, agud masugdan gilayon ang nagakaigo nga pagbulong kag pag-atipan.
Sa interview sang Bombo Radyo kay Amado, iya ginpahayag nga pito pa lang ka adlaw ang iya bata sang nahibaluan nila nga may MSUD ini paagi sa newborn screening.
Suno sa iya, sa subong, pito na ka tuig ang iya bata kag nagasunod sa istrikto nga pagkaon nga manubo sa protina, lakip ang paggamit sang espesyal nga gatas nga halin pa sa iban nga pungsod, suno sa panugyan sang doktor kag dietitian.
Ginpahayag man ni Amado nga may pagkaulihi sa paglakat kag paghambal ang iya bata, apang, sa subong nagalakat na ini kag nagapaidalum sa speech therapy.
Dugang pa niya, iya ginpalab-ot sa mga ginikanan nga indi madulaan sang paglaum, sundon ang panugyan sang doktor, kag ipaidalom gid sa newborn screening ang ila mga bata agud mahibaluan sang temprano ang posible nga kondisyon kag masugodan gilayon ang nagakaigo nga pagbulong.
