Ginpaidalom sa Blue Alert status ang Iloilo City sugod alas-8 sang Oktubre 21.
Ini ginpatigayon sang Iloilo City Disaster Risk Reduction and Management Office (CDRRMO) Operations Center bilang preparasyon sa posible nga epekto sang Bagyo Rosal (international name: Champi).
Antes sini, ginpatigayon sang CDRRMO ang Pre-Disaster Risk Assessment (PDRA) upod ang nagkalain-lain nga response clusters agud i-review ang mga tikang sa pagpanghanda kag pagresponde sa posible nga emerhensya.
Base sa weather bulletin sang Oktubre 19, bisan wala ginapaabot nga mag-landfall direkta sa lugar ang bagyo, posible gihapon nga makaeksperyensya ang Iloilo sang pag-ulan kag mabaskog nga hangin sugod Huwebes tubtob sa weekend.
Lakip sa ginreview ang kahandaan para sa rescue kag evacuation operations, health services, food supplies, peace and order, critical infrastructure, kag clearing operations.
Magapatigayon man sang district-level PDRA agud masiguro ang kahandaan sang mga distrito kag barangay, ilabi na sa mga lugar nga delikado sa pagbaha.
Ginapanawagan naman ang publiko nga padayon nga magmonitor sang opisyal nga weather advisories kag maghanda sa posible nga epekto sang bagyo.
Ginpahayag ni Mayor Raisa Treñas nga prayoridad sang Iloilo City Government ang kaluwasan sang tanan nga Ilonggo.
Text by: Bombo Cyrene A. Nasis
