Mainit nga nagbaisay sanday Vice Mayor Lady Julie Grace “Love-love” Baronda kag Councilor Romel Duron sa 41st Regular Session sang Iloilo City Sangguniang Panlungsod, subong nga adlaw, Oktubre 21.
Nag-ugat ang mainit nga komprontasyon sa tion sang deliberasyon sa resolusyon ni Duron nga i-adoptar ang DILG Legal Opinion No. 95, series of 2025 sa Internal Rules and Procedure (IRP) sa konseho.
Ang DILG Legal Opinion No. 95, series of 2025, nagasiling nga limitado ang legislative function sang bise-alkalde.
Ginpunto ni Duron nga apektado man sang nasambit nga opinion si Cebu City Vice Mayor Tomas Osmeña.
Dugang pa, ginlamodan sang lango-lango ni Duron ang nasambit nga deliberasyon nga suno sa iya abyan ni Baronda si Osmeña.
Apang, nasaklaw si Baronda sa ginhaboy nga tinaga ni Duron kag ginhatagan niya ini sang assignment nga ikumparar ang sitwasyon kung kaalyado sang mayorya si Osmeña ukon pareho sa iya nga miyembro sang minority bloc.
Madasig man nga nagsabat si Duron, “Ano mo ko suluguon nga?” rason nga nagpadayon ang mainit nga diskusyon.
Samtang, ginpahanumdoman ni Councilor Jose Maria “Nene” De La Llana ang konseho nga kinahanglan magbalik sa normal ang sitwasyon sang session.
Sa ulihi, napasar ang nasambit nga resolusyon nga may 13-1 nga boto, nga kung sa diin si Councilor Sheen Marie Mabilog lang ang nag-oppose.
𝐁𝐲: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
