𝗟𝗔𝗟𝗔𝗞𝗜, 𝗣𝗜𝗟𝗔𝗦𝗢𝗡 𝗠𝗔𝗧𝗔𝗣𝗢𝗦 𝗚𝗜𝗡-𝗕𝗨𝗡𝗢 𝗦𝗔 𝗗𝗜𝗦𝗧𝗥𝗜𝗧𝗢 𝗦𝗔𝗡𝗚 𝗠𝗢𝗟𝗢
Naga-ungot pa ang kutsilyo sa lawas sang isa ka lalaki matapos ginbuno sa Barangay South Baluarte, Distrito sang Molo, Iloilo City, pasado la-1:00 kaina sang kaagahon.
Ang suspek ginkilala kay alyas Karl samtang ang biktima naman amo si alyas Richard pareho nga residente sang nasambit nga lugar.
Gilayon nga gindala sa ospital ang biktima nga may madamo nga pilas sa lawas, samtang naaresto naman ang ginatudlo nga suspek sa insidente.
Sa interview sang Bombo Radyo kay Anthony Montano, saksi sa insidente, iya ginpahayag nga nagsugod ang away matapos nasalapay ukon naigo ni Richard ang tiil ni Karl sang ginpalakat sini ang e-bike halin sa basketball court.
Suno kay Montano, halin sa sinang insidente nagbaisay ang duha tubtob nga naglala ang ila diskusyon.
Gintinguhaan man niya nga pauntaton ang away, apang nakita niya nga may dala nga tubo si Richard.
Base sa inisyal nga impormasyon, nagbaisay anay ang biktima kag ang suspek antes natabo ang pagpamuno.
Sa ulihi, nagkuha sang kutsilyo ang suspek kag ginbuno ang biktima sa butkon, liog kag likod sang lawas.
Naga-ungot pa ang kutsilyo sa lawas sang biktima matapos ang insidente.
Ginapahayag nga nakainom sang makahulubog nga ilimnon ang suspek sang natabo ang pagpamuno.
Sa pihak nga bahin man interview sang Bombo Radyo Iloilo ang iloy sang biktima, iya ginpahayag nga nakibot siya sang gulpi nga nagpauli ang iya bata nga may madamo nga pilas kag mga buno sa lawas.
Gilayon nila ini nga gindala sa ospital agud mahatagan sang nagakaigo nga pagbulong.
Samtang, gilayon nga naaresto ang ginatudlo nga suspek kag yara na sa kustodiya sang Iloilo City Police Station 4 para sa nagakaigo nga proseso.
Text by: Bombo Jay Panizales
