Gindeklarar sang halos 100 ka mga student organizations kag youth leaders si Chinese ambassador Jing Quan nga banned sa nagkalain-lain nga mga eskwelahan sa Pilipinas.
Ini kasunod sang anunsyo sang Chinese embassy nga indi man nila pagpahanugutan ang pila ka mga opisyal kag personalidad sa Pilipinas nga makabisita sa China.
Nagpanguna sa nagkalain-lain nga mga organisasyon ang Student Council Alliance of the Philippines (SCAP) kag Akbayan Youth kon sa diin ila ginpahayag nga magapatigayon sila sang hublag-protesta kun magtapak ang Chinese envoy sa ila eskwelahan.
“Our schools must remain spaces for learning, critical inquiry, and the defense of truth, freedom, and national dignity. They must never be used as platforms for intimidation or for advancing narratives that threaten Philippine sovereignty and our territorial integrity,” suno sa nangin pahayag sang Akbayan Youth.
Suno kay Akbayan Youth national chairperson Khylla Meneses, indi dapat pag-abi-abihon si Jing sa mga eskwelahan sa Pilipinas samtang padayon sa pagpamahog sa pungsod ang China kag pang-harass sa mga manugpangisda kag frontliner sa West Philippine Sea
Ginapanawagan man sang nasambit nga organisasyon ang mga administrasyon sang mga institusyon nga magsuporta sa ila mga estudyante nga depensahan ang national sovereignty kag academic freedom.
Nahibaluan nga una na nga gin-deklara sang Kalayaan Town sa Palawan nga persona non grata si Jing bangod sang pagyaguta sini sa mga Filipino officials.
Liwat siya nga nangin kontrobersyal halin sang nagligad nga semana bangud sang pahayag sini nga mahapos para sa China nga malupig ang Pilipinas kun maggamit sila sang pwersa.
