Isa sa duha ka napatay sa pagpangtiro sa kapyestahan sa Barangay Sto. Rosario-Duran, City Proper, Iloilo City, kaina sang kaagahon ang isa ka construction worker nga nagabakal lamang sang fishball sang nasalabat sa insidente.
Ginkilala ang biktima nga si Angelito Tobinasa, 35 anyos, residente sang Barangay Osorio 2, San Remigio, Antique.
Sa interview sang Bombo Radyo kay Alejandro Pama, foreman sang nasambit nga construction, iya ginpahayag nga nagatrabaho bilang construction worker si Tobinasa sa Casa de España sa City Proper kag naga-board lamang sa Barangay Sto. Rosario-Duran.
Base sa inisyal nga impormasyon, gintiro ni Anthony Sta. Lucia, 36 anyos, ang iya kasimaryo nga si Conrad Gabo, 36 anyos, samtang nagainom-inom ini kaupod ang iya mga abyan.
Wala suno sa impormasyon sang komosyon antes ginluthang ni Sta. Lucia si Gabo.
Nakaangkon sang igo sang bala sa likod kag ulo si Gabo nga gintunaan sang iya kamatayon.
Samtang, malapit lamang sa lugar sang pagpangtiro si Tobinasa kag nagabakal sang fishball sang nasalabat siya sang bala nga nagigo sa iya ilok.
Gindala pa sanday Tobinasa kag Gabo sa ospital, apang gindeklarar man sila nga patay.
Napahibalo na ang pamilya ni Tobinasa sa Antique parte sa kamatayon sang ila himata.
Text by: Bombo Jay Panizales
