Ginpa-Bombo sang Panay Bukidnon Tribe sa Brgy. Panuran, Lambunao, ang isa ka quarry site nga gintukod sa ila nga suba.
Sa interview sang Bombo Radyo kay Amalia Labordo, isa ka IP Leader, iya ginpahayag nga apektado sang nasambit nga quarry ang suba nga may dako nga importansya sa ila palangabuhian ilabi na nga ginakuhaan nila ini sang tubig kag isda.
Ginpakigbahin niya nga bangud sa mga pagkutkut sa suba, may posibilidad nga maulamid man ang ila duta nga amat-amat nga makabkab sang suba.
Suno sa iya, wala gid sila sang may nabatun nga pahibalo nga may wala na nagakaangay nga operasyon sa ila duta kun sa diin may ara gid tani sila sang kinamatarong nga mang-indi sa aktibidad nga ginapatigayon sa ila lugar sa idalom sang Free, Prior and Informed Consent (FPIC) sang Indigenous Peoples.
Nagakabalaka man ang nasambit nga IP tribe bangud posible man nga magtuga na sang mas malala nga baha sa ila lugar ang nasambit nga quarry operation.
Dugang pa ni Labordo, mas maayo nga mapalab-ot sa National Commission on Indigenous Peoples (NCIP) ang ila nga reklamo agud mas mahatagan sang nagakaigo nga solusyon ang ila nga problema.
