Gin-aprubahan sang Iloilo Provincial Government ang P75 million loan assistance para sa pito ka mga kooperatiba agud mapasanyog ang ila mga produkto nga pang-agrikultura.
Paagi sa Office of the Provincial Cooperative Development Officer (OPCDO) nga nag-apruba sang assistance, katuyuan sini nga mapauswag ang operasyon sang mga kooperatiba kag mapabakod ang partisipasyon sa rice industry.
Sa P75-million nga alokasyon, P70 million ang ihatag sa anom ka kooperatiba sa idalom sang Mangunguma Sapnayon Palay Price and Production Support Program (MSPPPSP) samtang makadto naman ang P5 million sa kooperatiba sa idalom sang Provincial Livelihood Project Fund (PLPF).
Sa P70 million, tag-P15 million ang batunon sang Southern Iloilo Area Multi-Purpose Cooperative sa Oton kag Pototan Farmers Multi-Purpose Cooperative sa Pototan.
Tag-P10 million naman ang batunon sang Barotac Nuevo Development Cooperative sa Barotac Nuevo, Guimbal Development Cooperative sa Guimbal, Pinili Development Cooperative sa New Lucena, kag Kooperatiba Naton Multi-Purpose Cooperative sa Tigbauan.
Nagkadto ang P5 million sa PRO6 Development Cooperative agud suportahan ang mga inisyatibo para sa palangabuhian kag operasyon sang mga negosyo.
Gin-athag naman sang OPCDO nga padayon sa gihapon ang pagproseso agud ma-release na ang loan.
