Ginkwestyon sang Commission on Audit ang pila ka mga proyekto sang Iloilo City Government bangud sa outdated, missing, kag indi insakto nga detalye sa pila ka signboards sang ila infrastructure projects.
Sa nangin inspection sang COA sa 95 ka sample projects sa siudad, 18 sa mga outgoing projects ang ginkwestyon sang constitutional agency bangud sa outdated sini nga signboards.
Lakip na ang duha ka school-building projects nga wala sang Project information boards, kag isa ka proyekto nga may indi insakto nga titulo.
Apang suno man sa Office of the City Engineer, pila sa mga signboards ang gingguba sang bagyo, nagkaladula na, kag wala lang matalupangdan nga may ara sang sala nga impormasyon.
Pahayag sang COA, importante nga insakto ang detalye agud makit-an kag mahibaluan man sang publiko ang impormasyon may kaangtanan sa mga proyekto sang siudad kaangay sang pondo, contractors, kag amo man ang implementation progress.
Nagpahayag man ang ahensya nga dapat gid nga ipatuman ang standard signboards sa tanan nga mga ongoing projects sang siudad kun sa diin dapat man maimplementar ang strikto nga compliance kag transparency requirements.
Kaangot diri, nagpasalig naman ang City Government nga nagapadayun ang nagakaigo nga tikang sang siudad agud mangin insakto na ang ginapahayag nga kapaslawan sa pila ka mga proyekto.
