Gintugyan ni outgoing Public Works Secretary Vince Dizon kay incoming Department of Public Works and Highways (DPWH) Secretary Giovanni Lopez ang listahan sang mga opisyal kag empleyado sang ahensya nga ginapatihan nga nadalahig sa korapsyon.
Natabo ini sa seremonya sa headquarters sang DPWH matapos gin-anunsyo nga magabayluhanay sanday Dizon kag Lopez sang posisyon sa Gabinete; buot silingon, magabalik si Dizon sa daan sini nga posisyon sa Department of Transportation (DOTr).
Sa baylo nga flag bilang simbolo sang turnover sang liderato, ginhatagan ni Dizon si Lopez sang mga brown envelope nga may marka nga “secret”.
Didto kag ginpahayag sini nga dapat repasuhon ang listahan kag kakason gilayon ang mga empleyado nga mapamatud-an nga nadalahig sa korapsyon agud madula ang mga ginatawag nga “rotten apples” sa ahensya kag maprotektahan ang maayo nga mga empleyado.
“Imbes na flag, ito ang ipapasa ko sa kanya. Sec B [Lopez], ikaw na ang bahala sa mga ‘yan,” suno kay Dizon samtang ginahatag ang mga envelope.
“Tanggalin mo lahat ng mga ‘yan in the next few weeks, reviewhin mo na lang. We have to get rid of the rotten apples and protect the good ones,” dugang sini.
Suno kay Dizon, kapin 80 na ka empleyado sang DPWH ang ginpahalin sa ila mga posisyon halin sang siya ang nangin hepe sang ahensya sa tunga-tunga sang nagligad nga tuig sa kasagsagan sang kontrobersiya sa korapsyon nga may kaangtanan sa mga flood control projects.
Ginapaabot man niya nga madugangan pa ang mga empleyado nga pagakuhaon sa ila mga posisyon sa masunod nga pila ka semana.
Samtang, ginpasalig ni Lopez nga ipadayon niya ang mga reporma nga ginsuguran ni Dizon, ilabi na sa transparency, accountability kag pag-promote sang mga empleyado sang DPWH.
“My task is how to make these reforms work consistently in the DPWH and how to make it last, how to make it permanent regardless who sits in Malacañang, regardless who sits as Secretary po of DPWH,” suno kay Lopez.
“At kasama na rin po ‘yan na ipagpapatuloy natin lahat ng mga nasimulan ni Secretary Vince dito sa DPWH—’yong mga reforma pagdating sa transparency, sa accountability, sa pagfo-promote po ng mga empleyado po ng DPWH,” dugang sini.
Ginpaandaman man ni Dizon ang mga empleyado nga mahimo maghunahuna nga mas mahapos ukon mas malulo si Lopez sa pagpatuman sang disiplina, apang suno sa iya, mahimo nga kabaliskaran sini ang matabo.
“Kung iniisip nila na si Sec. Banoy is going to be easier or more lenient than me, I think everyone is in for a big, big surprise, because I think the opposite is true,” suno kay Dizon.
Ginduso man ni Dizon kay Lopez nga tutukan gid ang Bulacan bangud padayon nga ginabaha ang probinsya bisan pa sa binilyon ka pesos ang gin-gasto sa mga proyekto kontra sa pagbaha. Ang Bulacan amo man ang isa sa mga sentro sang imbestigasyon sa kontrobersiya sang korapsyon nga may kaangtanan sa mga flood control project.#
