Naglab-ot sa masobra 900 ka peke nga Person with Disability (PWD) Identification Card ukon PWD-ID ang nakumpiskar sang Persons with Disability Affairs Office (PDAO) sa syudad sang Iloilo.
Sa interview sang Bombo Radyo kay Eleanor Gregorio, head sang PDAO, iya ginpahayag nga madugay na nga ginakampanyahan sang ila opisina ang pagpugong sa paggamit sang peke nga PWD ID.
Bangud sini, suno sa iya, may yara na sang security features ang PWD ID agud masiguro kon lehitimo ukon authentic ini.
Pagpaathag ni Gregorio, indi husto nga maggamit sang peke nga ID para lamang makakuha sang mga discount kag iban pa nga benepisyo nga ginahatag sa mga PWD.
Ginpunto niya nga ang mga pribilehiyo ang para lamang sa mga persona nga may disability nga nagakinahanglan sang bulig.
Rason nga ila gid ginapanawagan sa publiko nga respetuhon ang mga benepisyo sang mga PWD kag untaton ang paggamit sang peke nga ID agud masiguro nga ang mga pribilehiyo ma-ihatag sa mga tawo nga nagakinahanglan gid sini.
