Nagapang-agda ang Santo Niño de Arevalo Parish Church sa Villa de Arevalo, Iloilo City, sa mga tumuluo nga magtambong sa Pre-Advent Recollections nga may tig-ulo The Coming of Anti-Christ nga patigayunon karon alas 7:00 sa gab-i, Oktubre 29.
Sa interview sang Bombo Radyo kay Dr. Rene Josef Bullecer, National Vice-President sang Council of the Laity in the Philippines, Country Director sang Human Life International, kag President sang Catholic Physicians’ Guild of the Philippines, iya gin-athag ang importansya sang paghibalo kag paghangop sa mga tagna nahanungod sa katapusan sang kalibutan, ilabi na ang pag-abot sang Anti-Christ.
Suno kay Bullecer, importante nga may ihibalo ang tagsa ka Kristiyano nahanungod sa The Coming of Anti-Christ agud mangin giya ini sa ila pagtuo kag espirituhanon nga pagpanghanda.
Iya man ginpunto nga kinahanglan tun-an kag hangpon sang mga Katoliko ang mga ginasiling sang Balaan nga Kasulatan nahanungod sa mga palatandaan antes ang pagbalik ni Hesukristo.
Lakip na diri ang mga butang nga dapat hibaluon kag pamalandungan sang mga tumuluo.
Ginpaangid man ni Dr. Bullecer ang ini nga recollection bilang mangin isa ka eye-opener para sa mga Katoliko agud mapalig-on ang ila pagtuo, madugangan ang ihibalo sa mga ginatudlo sang Simbahan kag bibliya.
