Gin-athag ni Andrea Brillantes ang iya bahin kasunod sang ginapahayag nga pagsunggodanay nila sang iya best friend kag social media personality nga si Bea Borres.
Suno kay Brillantes, posible nga nagsugod ang mga alegasyon matapos ang iya komento sa social media platform nga TikTok, kun sa diin ginpabutyag niya ang iya reaksyon sa nag-viral nga vlog ni Borres kaupod ang ex-boyfriend sini kag amay sang iya bata nga si Meray Yamada.
“I think it all started with my comment sa isang TikTok. And I kind of underestimated the kind of attention that would get,” siling ni Brillantes.
Dugang pa sang aktres, pribado na nila nga naistoryahan ni Borres ang isyu kag naklaro ang mga nagluntad, apang indi na siya maghatag sang dugang nga detalye parte sini.
“Bea and I already had a private conversation about this and I’ll always have love for Bea and for Pea. Pero I think that’s all I can say for now,” suno sa iya.
Madumduman nga ginpahayag ni Borres nga gin-block niya si Brillantes sa social media agud indi na sini makita ang iya mga vlog kaupod ang ex-boyfriend nga si Yamada.
Suno kay Borres, ginahimo niya ini bangud handum niya nga makatipon sang kuwarta halin sa ginansiya sang ila mga vlog agud makabakal sang asset nga mapuslan sang iya bata sa palaabuton.
