Gin-athag sang isa ka human rights lawyer nga isa ka tradisyon kag indi makabig nga nagabayolar sa layi ang mga nagasugal sa belasyunan.
Sa interview sang Bombo Radyo kay Atty. Joebert Pahilga, iya ginpahayag nga sa idalom sang Presidential Decree No. 1602, may yara sang proseso nga dapat sundon antes makasuhan kag ma-convict ang isa ka indibidwal.
Suno sa iya, dapat ikonsiderar nga ang pagpatigayon sang sugal sa belasyunan isa na ka tradisyon kag kabahin sang pagtililipon sang pamilya, ilabi na sa pagpangita sang gamay nga kantidad nga magamit sa ila kinahanglanon.
Dugang pa niya, indi dapat total prohibition ang pamaagi kundi regulation, agud malikawan ang pagpangabuso kag ilegal nga pagpusta.
Pahayag pa sini nga wala sang intensyon ang paghampang sa namatyan agud nga mag-commit sang krimen ukon magbayolar sang layi.
Ginakwestyon man niya ang pagdakop sa mga imol nga nagasugal sa belasyunan, samtang ang mga may ikasarang sa kabuhi makasulod sa casino kag makasugal.
Nagapanawagan man ini sa Philippine National Police bilang ahensya nga nagapatuman sang anti-illegal gambling laws nga dapat siguraduhon ang patas nga pagpatuman sang layi.
Dugang pa ni Atty. Pahilga dapat usisaon liwat sang kongreso ang Presidential Decree No. 1602 agud makonsiderar ang kultura, tradisyon kag kinamatarong sang mga pumuluyo.
