Gin-abandonar ang isa ka lapsag nga lalaki sa isa ka balay sa Panglao, Bohol, kaagahon sang Oktubre 30, 2026.
Base sa imbestigasyon sang kapulisan, nakit-an ang lapsag sa isa ka magamay nga lamesa sa gwa sang isa ka balay.
Suno pa sa nakakita, nabatian na lang sini nga nagahibi ang lapsag kag sang ginkadtuan sini natabunan ini sang itom nga jacket.
Nakipag-angot naman gilayon ang nakakita sa Panglao Emergency Medical Response Unit kag gilayon naman nga nagresponde ang Rural Health Unit kag kapulisan agud masigurado nga safe ang lapsag.
Padayon naman ang imbestigasyon sang kapulisan sa insidente agud mahibaluan kun sin-o ang nagbilin sang lapsag.
Nahibaluan nga ini na ang ikaduha nga insidente nga may nagbilin sang lapsag sa nasambit nga lugar sa sulod lamang sang apat ka adlaw.
Sadtong, Oktube 26, isa man ka lapsag nga babayi ang nasapwan.
Nakit-an ini sang isa ka 18-anyos nga estudyante, kag gilayon nga gindala sa ospital matapos makitaan nga ginkagat ini sang subay.
Base sa follow up investigation sang kapulisan, nadiskobrehan nga ang iloy sang lapsag, isa ka first-year college student kag halin sa Anda, Bohol.
Padayon naman ang imbestigasyon sang mga awtoridad sa duwa ka insidente agud mahibaluan ang kabug-usan nga rason sa hitabo.
