Luyag sang 100 pa ka mga indibidwal nga magparehistro bilang mga biktima sang drug war ni anay President Rodrigo Duterte bag-o mag-umpisa ang iya trial sa International Criminal Court (ICC) sa kaso nga crimes against humanity.
Pahayag sang ICC Registry sa Trial Chamber (TC) III, gin-usisa sang victims participation and reparations section sang Registry ang 46 ka mga application nga ginalakipan sang 96 ka mga indibidwal.
Ginbasehan ang pag-classify sang ulihi nga batch sang mga aplikante paagi sa Chambers Practice Manual sang ICC gamit ang “A-B-C” approach kun sa diin ang Group A nagapatuhoy sa kwalipikasyon sa mga indibidwal nga “clearly qualified” bilang biktima samtang ang Group B naman nagapatuhoy sa “clearly not qualified” kag ang Group C sa mga “could not make a clear determination for any reason”.
Suno kay Philipp Ambach, chief sang victims participation and reparations section sang Registry, mas mapadasig ang proseso kun ang nasambit nga model ang pagagamiton sa pag-screen sang mga aplikante.
Pananglitan nga mapasulod sa kaso ang bag-o nga batch sang applications, magadugang ini sa 539 nga una na nga gin-admit bilang mga biktima sa pretrial phase. Ang amo nga mga biktima kilalahon gihapon tubtub sa trial.
Maga-umpisa sa Nobyembre 30 ang trial ni Duterte sa ICC sa The Hague, Netherlands.
