[WARNING: SENSITIVE CONTENT]
Natapos sa isa ka makasilidhi nga krimen ang pagsaway sang isa ka 46-anyos nga iloy sa iya 15-anyos nga anak nga lalaki bangud sa pag-absent sini sa eskwelahan.
Ang biktima isa ka manunudlo.
Nadiskubre ang krimen matapos nagreklamo ang mga residente sang Barangay Looc, Panglao, Bohol sang tuman ka malain nga baho nga nagahalin sa septic tank.
Sang ginbuksan, didto na nakit-an ang bangkay sang biktima.
Sang gin-usisa ang anak, gin-ako niya ang krimen kun sa diin ginmartilyo niya ang iloy kag sang napatay na, ginbutong niya ini pakadto sa septic tank kag gintabunan sang mga bato.
Narekober naman ang martilyo nga gin-gamit sa krimen.
Nahibaluan nga wala sang iban nga upod ang mag-iloy sa ila balay.
Yara na sa paghinakop sang Department of Social Welfare and Development ang suspek nga ginakabig subong nga Child in Conflict with the Law.
