Bisan indi klaro ang iya panan-awan bangud sa katigulangon, gintinguhaan gid sang isa ka 84-anyos nga lola nga tumandok sang Mandurriao nga makatambong sa misa sa patyo kag mabisita ang nagtaliwan nga himata nga nalubong sa Mandurriao Public Cemetery.
Sa interview sang Bombo Radyo kay Loreta, iya ginpahayag nga kaangay man siya sa madamo nga tawo nga nagabisita sa sementeryo agud magdumdom sa ila mga nagtaliwan nga pamilya.
Suno sa iya, madugay na nga nagapuyo ang ila pamilya sa Mandurriao, apang nagtaliwan na ang pila ka miyembro sini, lakip na ang iya mga ginikanan kag duha ka anak nga subong yara na sa nasambit nga patyo.
Dugang niya, samtang masarangan pa niya, tinguhaan gid sini ang pagduaw sa patyo sa kada tion sang tigkalalag.
