Nagpaandam si Senator Panfilo ”Ping” Lacson sa mga awtoridad kaangot sa paghatag sang detalye sa publiko nahanungod sa operasyon para arestuhon si Sen. Ronald “Bato” dela Rosa.
Ini bangud importante suno sa iya nga mapabilin nga likom sa ihibalo sang publiko ang mga impormasyon sa pagpangita sang isa ka high-profile target.
Ginpunto man sini nga dapat mapabilin nga confidential ang mga importante nga impormasyon tubtob nga wala pa matapos ang operasyon, magluwas na lamang kun ang istratehiya amo nga mapagwa ang target sa iya nga ginataguan.
Ini kasunod sang ginpabaskog nga manhunt sang Philippine National Police (PNP) kay Dela Rosa matapos mag-expire sang nagligad nga Byernes , Oktubre 30 ang deadline sa boluntaryo nga pag-surrender sini.
Nahibaluan nga magahatag si Interior Secretary Jonvic Remulla sang premyo nga nagabalor sang P50 milyon sa kun sin-o ang makahatag sang impormasyon nga sa nahamtangan sang senador.
Samtang, ginpahayag ni Lacson nga mas maayo nga igahatag sa PNP ang desisyon kun san-o kag ano nga impormasyon ang dapat nga ipagwa bangud mas masangkad ang access sang mga ini sa intelligence information.
Nahibaluan nga nagapangatubang sa arrest warrant si Dela Rosa nga ginpagwa sang International Criminal Court kaangot sa crimes against humanity batok sa kampanya kontra ilegal nga droga sa administrasyon ni anay President Rodrigo Duterte.
