Ginalantaw sang General Services Office (GSO) ang posibilidad nga usisaon ang mga bubon sa mga pampubliko nga eskwelahan sa siyudad bilang alternatibo nga source sang tubig sa tion sang El Niño phenomenon.
Ini matapos mag-request ang Iloilo City Government sang dugang nga survey sa mga public schools agud mahibaluan kung may mga available nga bubon sa sulod sang eskwelahan nga mahimo magamit sa tion sang water shortage.
Sa interview sang Bombo Radyo kay GSO Head Engineer Neil Ravena, sa ginatos nga initial survey reports, wala pa sang significant nga pagnubo sa volume sang tubig sa 25 ka barangay nga ginakabig nga critical areas, apang padayon pa ang monitoring sang siyudad.
Ginpahayag man ni Ravena nga wala pa nalakip sa nauna nga survey ang mga pampubliko nga eskwelahan bangud kadam-an sa gin-usisa amo ang mga bubon nga ginagamit sang mga residente sa mga barangay ukon communal wells.
Ginalantaw niya nga mahimo mangin dugang nga water source ang mga eskwelahan bangud mas malapad ang ila nga lugar kag posible nga mas maayo ang kondisyon sang ila mga bubon, apang kinahanglan anay ini nga ma-survey kag ma-undergo sa laboratory testing agud masiguro nga safe ang tubig nga pagagamiton.
Dugang pa ni Ravena, indi lamang ang volume sang tubig ang ginamonitor kundi lakip man ang posibilidad sang contamination kag saltwater intrusion, ilabi na sa mga coastal barangays.
Madumduman nga kapin sa 1,000 ka shallow wells ang yara sa monitoring sang GSO, nga posible maapektuhan kung magapadayon ang pagnubo sang pag-ulan bangud direkta nga konektado ang ini sa groundwater supply.
Gani, ginapanawagan man niya ang publiko nga magtipid kag mag-amlig sa paggamit sang tubig, ilabi na sa mga communal shallow wells nga ginagamit sang madamo nga pamilya.
Sa karon, padayon man ang paghatag sang information and education materials kag mga orientation sa mga barangay tuhoy sa husto nga water conservation kag malikawan ang contamination sang mga water sources.
Text by: Bombo Cyrene A. Nasis
