Ginaprubahan sang Iloilo City Council ang UNA Credit Access for Resilient Enterprises (CAREs) Program nga posible makahatag sang P5,000 tubtob P100,000 nga interest-free loan sa mga qualified nano entrepreneurs sa syudad.
Suno sa author sang ordinansa nga si Councilor Rudolph Jeffrey Ganzon, posible makabulig ang nasambit nga programa sa mga negosyante nga wala sang collateral ukon credit history.
Suno sa iya, paagi diri, mahagan-hagan ang mga pangabudlay sang mga negosyante sa pagpangayo sang bulig sa mga informal moneylenders nga nagapatong sang mataas nga interest ukon ginatawag nga “5-6”.
Sandig sa probisyon sang programa, magahatag ini sa mga negosyante sang interest-free loans nga may minimal service fee, kag P3 million naman ang nakatigana nga pondo sa pagpatigayon sini.
Ang UNA CAREs Program magaserbe nga komplementaryo sa Iloilo City Nano Enterprise Ordinance kag mangin kabahin sang Negosyo Development Academy, nga anay Uswag Negosyo Academy (UNA).
