Padayon nga nagahulat ang Local Government Unit (LGU) sang Dueñas tuhoy sa ila gin-request sa Iloilo Police Provincial Office sa pagpakay-o sang naguba nga patrol car sang Dueñas Municipal Police Station.
Sa interview sang Bombo Radyo kay Dueñas Mayor Robert Martin Pama, iya ginpahayag nga nag-abot sa kapin P300,000 ang initial nga appraisal sa damage sang salakyan rason nga nabudlayan ang ila banwa nga akuon ang bug-os nga balor sang pagpakay-o sini.
Suno kay Pama, mahimo nga naaksidente ang patrol car matapos nga magpatigayon ang mga kapulisan sang chekpoint sang sini lang man nga tuig, apang wala naman sang may nasamaran sa insidente.
Dugang pa sang alkalde, ginpangabay na niya ang IPPO nga maghatag sang ila bahin sa repair expenses bangud daku ang kantidad nga kinahanglan gastuhon kag limitado lamang ang pondo sang lokal nga panguluhan.
Sa karun, temporaryo nga ginagamit sang mga kapulisan ang salakyan sang lokal nga panguluhan sa ila pagpatrolya agud nga mamintinar ang kalinong kag seguridad sa banwa.
