Luyag nga magpatuman sang Office of the Civil Defense (OCD) 6 sang 15-year Integrated Water Resource Management Master Plan nga magaserbe nga solusyon sa pagtapna sang pagbaha kag pagpangita sang paagi sa kakulangan sa suplay sang tubig sa Iloilo City.
Sa interview sang Bombo Radyo sa director sang OCD-6 nga si Director Raul Fernandez, iya ginpahayag nga indi lamang ang syudad sang Iloilo ang dapat nga magkilala sa mga problema nga ini kundi pati man ang mga kaiping nga banwa bangud nagahalin sa mga ini ang tubig nga naga-agos man sa river system.
Suno kay Fernandez, importante ang pag-replenish sang ground water agud nga malikawan ang over-extraction nga posible nga magresulta sa saltwater intrusion kag ground subsidence.
Dugang pa niya, ginalantaw nga pagabahinon sa lima ka phases ang 15-year master plan, nga magalakip man sang Tigum kag Maasin Watersheds. Apang kinahanglan pa ini sang validation kag dugang nga pagtuon antes mapatuman.
Sa karun, naghingyo naman ni Fernandez sang kooperasyon sang mga ahensya kag LGUs tuhoy sa water resource management sang rehiyon agud nga makatipon sang isa ika solusyon.
