Gin-athag sang isa ka eksperto nga ang skin cancer isa ka balatian sa panit nga mahimo magtubo bangud sa madugay nga exposure sa adlaw.
Sa interview sang Bombo Radyo kay Dr. Luzsil M. Catedral, espesyalista sa ear, nose, throat, head and neck surgery, iya ginpahayag ang madugay nga pag-expose sa ultraviolet rays sang adlaw isa sa mga panguna nga risk factors sang skin cancer.
Lakip man diri ang masami nga pagpapa-tan kag family history sang amo nga balatian kag mataas man ang risgo sini sa mga tawo nga may maputi nga panit, kaangay sang mga foreigner.
Suno sa iya, mahimo ini magsugod sa isa ka alom nga amat-amat nagabag-o ang porma kag duag, bangud man sa abnormal nga pagdamo sang mga cellula sa panit.
May tatlo ka common nga klase sang skin cancer, lakip ang squamous cell carcinoma, basal cell carcinoma kag malignant melanoma, nga ginakabig nga pinakamapintas nga klase sini nga balatian.
Samtang, ginpahanumdom ni Catedral sa publiko ang importansya sang pagkonsulta sa espesyalista kun may makita nga abnormal nga pagtubo kag pagbag-o sa panit agud mahibaluan kun ini ordinaryo lamang nga alom, impeksyon, ukon posible nga skin cancer.
Dugang pa niya, daku ang mabulig sang temprano nga pag-diagnose agud maatubang gilayon ang balatian kag malikawan ang paglala sini.
