Ginpabutyag sang Sigla Research Center ang kabalaka sa proposed social media ban para sa mga minors, bangud mahimo ini magresulta sa mas malapad nga epekto sa digital rights sang mga Pilipino, lakip na ang freedom of expression kag privacy.
Ini ang kasunod sang ginaduso nga mga bill, lakip ang Senate Bill No. 2424, nga pagdumili sa paggamit sang social media sang mga Pilipino nga wala pa naga-edad 18-anyos.
Samtang, sa House Bill No. 11566, ang pagdumili naman sa mga kabataan nga wala pa naga-edad 13-anyos sa paghimo sang social media accounts kag paggamit sang online platforms.
Sa interview sang Bombo Radyo kay Rossine Fallorina, Managing Director sang Sigla Research Center, iya ginkwestyon ang age verification ukon age assurance mechanisms nga ginaduso sa amo nga mga bill.
Suno kay Fallorina, ang kinahanglanon nga pagsumiter sang Philippine Identification System ID ukon iban nga government-issued ID agud ma-verify ang edad sang social media users ang mahimo gamiton sang gobyerno sa pag-monitor sa mga naga-post online ilabi na may kaangtanan sa isyu sang gobyerno.
Ginpunto niya nga mahimo ini magresulta sa pagkadula sang anonymity kag makapahadlok sa mga tawo nga magpahayag sang ila opinion.
Ginpatpat man niya nga posible man maapektuhan ukon madulaan sang access sa social media ang mga Indigenous Filipinos kag mga pumuluyo sa far-flung areas ukon malayo nga mga lugar nga wala sang government-issued IDs ukon limitado ang access sa pagkuha sini.
Ginpabug-atan ni Fallorina nga may katungod man ang mga kabataan sa freedom of expression, freedom of speech kag political participation kun sa diin kinahanglan ang safety mechanisms nga nagahatag sang proteksyon sa mga minors.
Apang, ang pagpsiguro sang ila safety ang indi dapat magresulta sa paglimitar sang ila mga kinamatarong.
Dugang pa, sa baylo nga blanket ban ang pagahimuon, ginapanawagan ni Fallorina nga mas tutukan sang social media platforms ang harmful content kag online exploitation, paagi sa mas epektibo nga pagpatuman sang community guidelines, pagpaayo sang safety mechanisms, kag pag-remove sang mga illegal kag harmful content.
