Patay ang isa ka 18-anyos nga estudyante matapos magbungguanay ang iya nga ginamaneho nga motorsiklo kag isa ka awto sa Barangay Natividad, Barotac Viejo, Iloilo, sang Nobyembre 8, 2026.
Ginkilala ang biktima kay Alyas Toto, residente sang Brgy. Rizal, Barotac Viejo.
Base sa inisyal nga imbestigasyon, ang awto pakadto sa Banate, samtang ang motorsiklo nagapadulong naman sa Barotac Viejo.
Total wreck ang motorsiklo, samtang nag-angkon naman sang damage sa atubang nga bahin ang awto.
Nakaangkon sang head injury ang biktima nga gintunaan sang iya kamatayon.
Mahibaluan nga wala ini suksok nga helmet sang nagluntad ang insidente.
Apang, wala na sa lugar ang driver sang awto matapos niya gin-abandona ang iya salakyan.
Suno sa pamilya sang biktima, willing sila sa pag-settle sang insidente bangud wala na sila sang mahimo bangud patay na ang ila himata, ang ila lang ginapangabay nga mabuligan sila sa expenses.
Padayon naman ang pagpangita kag pag-identify sang kapulisan sa driver sang salakyan kag ginapanawagan nga mag surrender na ini.
