Tuman pa ka temprano nga topiko kun bala imbitaron sang defense team si Vice President Sara Duterte bilang testigo sa kaugalingon sini nga impeachment trial.
Ini ang nangin pahayag ni defense counsel kag spokesperson Michael Poa matapos umpisahan sang kampo ni Duterte ang presentasyon sang ila nga mga ebidensya sa ika-40 nga adlaw sang trial sa Senado kahapon nga adlaw sang Lunes, Nobyembre 9.
Suno kay Poa, nagapabilin ang 30 ka adlaw nga ginpain sang depensa para sa presentasyon sa ila nga mga ebidensya kag testigo agud nga batuan ang mga alegasyon batok sa bise presidente sa wala ginapadugay ang proseso.
Samtang, liwat nga ginpunto ni House lead prosecutor Gerville Luistro nga dapat magtestigo si Duterte sa impeachment court bangud siya lamang ang labi nga makahatag sang kasanagan sa mga seryoso nga alegasyon batok sa iya.
Nagpangabay man ang defense team sang subpoena para sa masobra 20 ka testigo nga tuyo nila nga ipaatubang sa trial sa Lunes tubtob Byernes subong nga semana.
Lakip sa mga alegasyon nga kinahanglan nga sabton sang depensa ang gina-alegar nga unexplained wealth ni Duterte, indi kumpleto ukon indi matuod nga dekalrasyon sang mangaad sini sa iya nga SALN kag ang kapaslawan sa pag-untat sini sa pagpakig-angot sa Negosyo samtang nagaserbe ini bilang bise presidente.
