Wala sang operational ukon nagagana nga CCTV cameras sa palibot sang selda ni former House Speaker Martin Romualdez sa New Quezon City Jail – Male Dormitory sa Payatas, suno sa Sandiganbayan Third Division.
Ini matapos ang ocular inspection sang anti-graft court agud usisaon ang kondisyon sang pagkapreso ni Romualdez, lakip na ang security arrangements kag monitoring system sang nasambit nga pasilidad.
Base sa eight-page order sang korte, 220 lamang sa 450 ka installed CCTV cameras sa pasilidad ang nagagana.
Samtang, 28 lamang sa 152 ka CCTV cameras sa areas kun sa diin nahamtang si Romualdez kag iban pa nga high-profile inmates ang operational.
Bangud sini, ginamanduan na sang korte si BJMP Chief Jail Director Efren Nemeño nga magsumiter sang report tuhoy sa kondisyon sang CCTV surveillance system sa sulod sang 10 ka adlaw halin sa pagkabaton sang notice.
Matandaan nga nag-ugat ang pag-usisa sang korte sa alegasyon nga nagaguwa-sulod si Romualdez sa detention facility sakay sang ambulance.
