Ginkumpirma sang Supreme Court (SC) ang one-year suspension sa medical practice sang isa ka government physician matapos mapamatud-an nga guilty ini sa gross negligence ukon grave nga pagpabaya sa pag-atipan sa isa ka iloy nga manugbata, nga nagresulta sa iya kamatayon kag sang iya anak nga yara pa sa iya nga tyan.
Sa 14-page decision nga ginsulat ni Associate Justice Jhosep Lopez, gin-uphold sang Second Division sang Supreme Court ang desisyon sang Court of Appeals (CA) batuk kay Dr. Vivian Flores, chairperson sang Department of Obstetrics and Gynecology sang Dr. Catalino Gallego Nava Provincial Hospital sa Guimaras.
Nag-umpisa ang kaso sa administrative complaint nga ginpasaka ni Helen Garque, anak sang biktima nga si Welma Garque, batuk kay Dr. Flores, attending physician nga si Dr. Caballero kag pila pa ka medical personnel sang provincial hospital bangud sa alegasyon sang gross negligence kag incompetence.
Base sa court records, mga alas-5:00 sang aga sang November 15, 2013, gindala sa provincial hospital si Welma matapos makaeksperyensya sang tuman nga labor pains.
Sang gin-usisa siya ni Dr. Caballero, duha pa lang ka sentimetro ang cervical dilation, gani ginlaygayan siya nga maglakat-lakat anay sa sulod sang hospital.
Pag-abot sang alas-8:00 sang aga, naglupok ang iya panubigan samtang nagalakat, gani gilayon siya nga gindala liwat sa emergency room.
Didto nakita nga nagdasig na ang pagbukas sang iya cervix kag naglab-ot na sa 6 tubtob 7 centimeters.
Ginhatagan siya sang intravenous fluids kag iban pa nga bulong antes ginsaylo sa labor room, sa idalom sang pag-atipan kag supervision nanday Dr. Flores, Dr. Caballero kag mga hospital nurses.
Sandig sa complaint, halos walo ka oras nga nagpabilin si Welma sa labor room, halin alas-8:00 sang aga tubtob alas-3:50 sang hapon.
Sa amo nga tion, ginpunggan ang iya pamilya kag mga kaupod nga makasulod sa labor room.
Wala man sila sang regular nga nabaton nga updates nahanungod sa medical condition ni Welma.
Mga alas-3:30 sang hapon, ginpahibalo ni Dr. Caballero ang mga kaupod sang pasyente nga nagluya na gid si Welma kag kinahanglan na siya nga madala sa iban nga medical facility bangud compromised na ang heartbeat sang bata.
Mas naglala ang sitwasyon sang gin-report nga ginpunggan anay sang hospital administration ang emergency transfer bangud sa billing discrepancy nga nagabalor lamang sang P15.
Sang na-clear na ang problema sa billing, gindala si Welma sa Western Visayas Medical Center (WVMC) sa Iloilo City.
Apang suno sa pamilya, kulang ang medical coordination sa pag-transfer sa pasyente.
Wala sang qualified medical personnel nga nag-upod sa iya sa biyahe, kag wala man sang ambulance ukon nagakaigo nga salakyan nga naghulat sa ila pag-abot sa Iloilo port.
Pag-abot ni Welma sa WVMC, nagnubo na ang iya blood pressure kag na-comatose.
Apisar pa gintinguhaan sang medical team nga ma-revive siya sa sulod sang duha ka oras, gin-declare siya nga patay alas-7:15 sang gab-i.
Wala man naluwas ang bata nga yara pa sa iya tiyan.
Sa autopsy nga ginhimo ni Dr. Nicasio M. Botin, medico-legal officer sang National Bureau of Investigation-Western Visayas Regional Office (NBI-WEVRO), nahibaluan nga ang cause of death ni Welma amo ang hemorrhagic shock bangud sang uterine bleeding nga resulta sang abruptio placenta ukon temprano nga pagbulag sang placenta sa uterus.
Nagsanto ini sa initial findings sang WVMC sa diin nasaad ang multi-organ failure bangud sang hypovolemic shock nga resulta sang acute blood loss.
Sa administrative complaint nga ginpasaka sa Professional Regulation Commission (PRC), gin-akusaran ni Helen ang mga doktor kag medical personnel sang kapalpakan sa paghatag sang nagakaigo nga medical care kag indi pagsunod sa basic standards sa pag-atipan sang pasyente.
Sang ulihi, nakita sang Board of Medicine kag Board of Nursing nga guilty sa medical negligence sanday Dr. Flores kag Dr. Caballero.
Samtang, gin-dismiss ang mga kaso batok sa mga nurses bangud kulang ang ebidensya.
Gin-apelar ni Dr. Flores ang desisyon sa Court of Appeals, apang gin-dismiss man ini sang appellate court.
Suno sa CA, may substantial evidence nga nagapakita sang iya gross negligence sa pagtuman sang iya responsibilidad bilang doktor ni Welma.
Sa pag-affirm sang Supreme Court sa desisyon sang CA, ginpahayag sini nga applicable sa kaso ang legal doctrine nga “res ipsa loquitur”, ukon “the thing speaks for itself.”
Ginpaathag sang SC nga ang malala nga kondisyon ni Welma sang pag-abot niya sa WVMC, nga yara na sa coma kag may delikado nga pagkadula sang dugo, nagapakita sang kabug-at sang pagpabaya sa pag-atipan sa pasyente.
Sa idalom sang nasambit nga legal doctrine, ang circumstances ukon resulta sang isa ka insidente mahimo na mangin basehan sang korte nga mag-presume nga may negligence, apisar wala pa sang direct nga ebidensya nga nagapakita sang insakto nga pagpabaya.
Responsibilidad naman sang ginareklamo nga medical professional nga maghatag sang nagakaigo nga explanation agud mapamatud-an nga wala siya nagpabaya.
Ginpunto man sang Supreme Court nga para mapamatud-an ang medical negligence, kinahanglan mapakita ang apat ka elemento: una, may duty of care ang doktor sa pasyente; ikaduha, may paglapas ukon breach sa established medical standards; ikatatlo, may direkta nga koneksyon ang pagpabaya sa injury ukon kamatayon sang pasyente; kag ikaapat, may damages ukon danyos nga resulta sini.
Text by: Bombo Lynd-C Bade
